LBL_LOGO

A necesidade de transposición parcial da Directiva Directiva 2002/91/CE de eficiencia enerxética dos edificios, así como a harmonización co Documento Básico de Aforro de Enerxía do Código Técnico da Edificación, a incorporación de novas esixencias de aforro e eficiencia enerxética deste tipo de instalacións e a experiencia da súa aplicación práctica durante os últimos anos converxen na revisión deste regulamento.

O Real decreto foi elaborado conxuntamente polo Ministerio de Industria, Turismo e Comercio e o Ministerio de Vivenda.

As maiores esixencias en eficiencia enerxética que establece o RITE concrétanse en:

Maior rendemento enerxético nos equipos de xeración de calor e frío, así como os destinados ao movemento e ao transporte de fluídos.

Mellor illamento nos equipos e conducións dos fluídos térmicos.

Mellor regulación e control para manter as condicións de deseño previstas nos locais climatizados.

Utilización de enerxías renovables dispoñibles, en especial a enerxía solar e a biomasa.

Incorporación de subsistemas de recuperación de enerxía e o aproveitamento de enerxías residuais.

Sistemas obrigatorios de contabilización de consumos no caso de instalacións colectivas.

Desaparición gradual dos combustibles sólidos máis contaminantes.

Desaparición gradual dos equipos xeradores menos eficientes.

Co fin de facilitar o cumprimento das esixencias do RITE créanse os denominados documentos recoñecidos, que se definen como documentos técnicos sen carácter regulamentario, pero que contan co recoñecemento conxunto do Ministerio de Industria, Turismo e Comercio e o Ministerio de Vivenda. De acordo co artigo 7 do RITE foi creado un Rexistro xeral de documentos recoñecidos do RITE, adscrito á Secretaría Xeral de Enerxía do Ministerio de Industria, Enerxia e Turismo.

O RITE, ademais, impón a obriga de revisar e actualizar periodicamente, polo menos cada cinco anos, as esixencias de eficiencia enerxética. Esta tarefa é competencia da Comisión Asesora do RITE, encargada de realizar as propostas conforme á evolución da técnica e da política enerxética nacional.

Este Real decreto ten o carácter de regulamentación básica do Estado. Para a súa aplicación as comunidades autónomas deberán desenvolver a regulamentación complementaria correspondente, isto é, as comunidades autónomas poderán introducir requisitos adicionais sobre as mesmas materias cando se trate de instalacións radicadas no seu territorio.