LBL_LOGO LBL_LOGO

TECNOLOXÍAS SECTORIAIS

Sector industrial

Promoción de investimentos en substitución de equipos e instalacións en mellor tecnoloxía dispoñible (MTD): investimentos en equipos de proceso, instalacións e sistemas que transforman ou consomen enerxía no proceso produtivo, ademais dos sistemas auxiliares necesarios para o funcionamento; proxectos de enxeñería asociada; obra civil de implantación deses equipos; montaxe e posta en marcha.

Sector transporte

Promoción do investimento na renovación de frotas e promoción de combustibles alternativos no transporte: investimento en equipos destinados ao transporte de persoas e mercadorías por estrada (vehículos turismo e industriais eléctricos, de hidróxeno e híbridos), e en cargadores e rede de loxística de subministración a vehículos eléctricos.

Sector edificación

• Promoción de investimentos na rehabilitación da envolvente térmica de edificios existentes: investimentos na envolvente térmica dos edificios destinados a reducir a demanda enerxética de calefacción e refrixeración.
• Construción de edificios novos con cualificación enerxética A ou B: investimentos en edificios de nova construción (medidas de eficiencia enerxética para a envolvente térmica, instalacións de calefacción, climatización e produción de auga quente sanitaria e iluminación interior) que permitan alcanzar a cualificación enerxética de clase A ou B, mediante unha redución do seu consumo de enerxía, cumprindo o que establece o R. D. 47/2007, do 19 de xaneiro, polo que se aproba o procedemento básico para a certificación de eficiencia enerxética de edificios e a normativa autonómica que lle sexa de aplicación). 
• Promoción de investimentos na renovación de instalacións térmicas de edificios: investimentos en equipos, instalacións e sistemas que transforman ou consomen enerxía, proxectos de enxeñería, obra civil, montaxe e posta en marcha. 
• Promoción de investimentos na renovación da iluminación interior: investimentos en equipos, instalacións e sistemas que supoñan un nivel de eficiencia mínimo marcado no HE3.

Sector transformación da enerxía 

• Promoción de investimentos en instalacións de coxeración en sectores non industriais: investimentos en equipos, instalacións e sistemas que transforman ou consomen enerxía, proxectos de enxeñería, obra civil, montaxe e posta en marcha, cunha potencia superior a 150 kWe.
• Promoción de investimentos en instalacións de microcoxeración: investimentos en equipos, instalacións e sistemas que transforman ou consomen enerxía, proxectos de enxeñería, obra civil, montaxe e posta en marcha, cunha potencia inferior a 150 kWe.

PRAZOS

A convocatoria 2009 estará aberta desde o día seguinte á data da súa publicación no Boletín Oficial do Estado (8 de abril de 2009) e pecharase transcorridos tres meses.

INSTRUMENTO DE XESTIÓN

O instrumento seleccionado para apoiar as empresas dentro deste programa serán os CONVENIOS ou CONTRATOS - PROGRAMA DE INVESTIMENTO EN AFORRO E EFICIENCIA ENERXÉTICA entre as empresas ou corporacións seleccionadas e o IDAE.

Para chegar a eles, na convocatoria anual de axudas publicada no BOE, especifícase o contido que deberán incluír as propostas das empresas (Plans Estratéxicos de Investimentos en Proxectos de Aforro e Eficiencia Enerxética 2009-2012).

Algúns dos elementos que compoñerán este Plan Estratéxico serán:

• Obxectivos empresariais do Plan Estratéxico (competitividade, medio natural, etc.).
•  Estrutura/organización da empresa (subministracións, produción, distribución…). 
• Localización exacta das instalacións afectadas, descrición das actuacións que se van acometer en cada unha das localizacións con indicación dos investimentos e aforros enerxéticos estimados e planificación temporal dos investimentos para cada un deles. 
• Análise tecnolóxica de procesos e equipos actuais, e análise de alternativas existentes (benchmarking…). 
• Selección de tecnoloxías que hai que implementar (MTD…). 
• Determinación dos custos elixibles segundo as Directrices comunitarias sobre axudas estatais en favor do medio natural (2008/C 82/01) e o anexo II das presentes bases. 
• Plan de investimentos. 
• Plan de financiamento. 
• Solicitude de apoios públicos estimados segundo o método de cálculo establecido polas Directrices. 
• Aforros enerxéticos e redución de emisións. 
• Adaptación da solicitude da axuda ao criterio de efecto incentivador segundo as Directrices. 
• Beneficios ambientais asociados á mellora da eficiencia enerxética (directos e indirectos). 
• Planificación temporal (2009-2012). 
• Recursos e organización (capacidades internas e externas). 
• Outros beneficios (creación de emprego, redución de residuos, valoración da mellora competitiva, etc.).

A determinación dos custos elixibles dos proxectos de investimento, ademais dos aforros enerxéticos e a redución de emisións, deberá ser certificada por unha empresa acreditada como “verificador do comercio de dereitos de emisión de gases efecto invernadoiro”, que ratificará o método de avaliación de acordo coas Directrices.
Esta empresa acreditada presentará un informe non vinculante que acompañará o Plan Estratéxico de Investimentos.

FORMA DE PRESENTACIÓN DAS SOLICITUDES

A entrega física das solicitudes asinadas, segundo o formulario habilitado para o efecto na propia convocatoria, deberá efectuarse nas oficinas do IDAE situadas na rúa Madera número 8 (traseira pola rúa San Roque 7), 28004-Madrid, dirixidas ao director xeral do IDAE, indicando no sobre “Solicitude de participación no PROGRAMA DE AXUDAS DO IDAE AO FINANCIAMENTO DE PROXECTOS ESTRATÉXICOS DE INVESTIMENTO EN AFORRO E EFICIENCIA ENERXÉTICA”, no que se farán constar claramente os datos da entidade remitente.